طالبت نايبة بالدقهلية تدعي أمال طرابية، عضو مجلس النواب، الحكومة بحل مشكلة الطرق التى تتسبب فى العديد من الحوادث ومنها طريق دكرنس، مشيرة إلى أنه فى أقل من 6 أشهر مات 63 شاباوأستطردت سيادة النايبة كلامها قائلة “كل يوم شباب يموت، والنهاردة أهالى الدائرة بيقولوا لى هنقطع الطريق، عايزين ازدواج 7 كيلومتر فى الطريق فقط لإنقاذ الشباب، عايزين نحسس الناس فى الشارع إننا بنشتعل ” طيب يا ست النايبة متروحي الدايرة إللي أنتي منها وأعملي لهم توعية ضد البلبعة وضد الضرب ، لا مش الضرب إللي بالك فيه ، لا الضرب ابن عم البلبعة ، ضرب البيسة ، ضرب الكُلَة ، ضرب الشرابات ، وبالمرة خليهم يقللوا السرعة ومش ضروري سباق الرالي إللي بيعملوه ده يا ست الكل ، طبعا الست هانم موقفتش عند هذا الحد دا كمان ، بتقول لزملاءها إن ” الناس بتموت ببلاش ومش عارفة أقولهم إيه” ، الله يمسيكي بالخير يا ست شرين ، فاكرين مسرحية المتزوجون ، طيب بخيت وعديلة ، طيبة ، شوفتوا لما كانت بتقول يا حرام ، كانت بتطلع من بقها زي العسل والله الحاجة أمال فكرتني بالست شرين هما ممكن يكونوا ولاد عم ولا حاجة .
بس تعالي هنا يا سيادة النايبة وقوليلي هو المطلوب الناس تموت و كمان الدولة تديهم فلوس يا خبر يا سيادة النايبة دا أنتي نايبة لوز ، يعني الدولة ترضعهم وطعمهم وتعلمهم وتعمل لهم طرق ببلاش ومستشفيات عشان لما يموتوا يروحوا يتحطوا فيها ، والأخر الدولة تدفعلهم فلوس ، هي الدولة كانت قالت لهم موتوا ، ميصحش كدة والله يا ست الحاجة ، وبعدين طرح الموضوع ميبقاش بالوضع دة يا ريت تكوني شاطرة في الجمع
المشكلة إن سيادة النايبة مكتفتش بموضوع الناس إللي بتموت علي الطرق وعاوزة تحل موضوع أزمة محصول القمح، وإن الفلاحين نايمين فى الشوارع ومعاهم القمح ، طيب يا تري القمح نايم في حضنهم ، طيب إنتي عندك قمح نايمه معاه يا ست الكل ، طيب أخبار الأرز إيه يا تري في حضنهم برضو في الشارع ، أنا سامع إنهم بيسقعوه عشان سعرة يرتفع ، طيب متقولي لهم يسقعوا القمح ولا خايفة لا يكش لا دا لما هتسقعيه هيتمدد ويتغول دا الرز الكيلو دلوقتي ب ٨ جنية .
